Навіны

Апазіцыя рыхтуе Маршы салідарнасці па ўсёй краіне

Пра гэта абвешчана на прэс-канферэнцыі аргкамітэта па правядзенні 1 траўня Маршу салідарнасці ў падтрымку ўсіх рэпрэсаваных, які пройдзе ў Менску.

Маршы салідарнасці ў рэгіёнах стануць працягам працы, якую распачалі прадстаўнікі дэмакратычнага руху з пачатку гэтага года, кажа старшыня Аб’яднанай грамадзянскай партыі Анатоль Лябедзька:

– Для нас гэта працяг Маршаў недармаедаў, якія адбыліся ў лютым і сакавіку. Больш за тое, на гэтым мы не спыняемся, бо адно з пасланняў: трэба мяняць эканамічны курс і сацыяльную палітыку. Гэта наша агульнае патрабаванне і правых, і левых, якія ўваходзяць у аргкамітэт. І пасля 1 траўня будуць праведзены новыя акцыі, мы будзем падаваць заяўкі.

Заяўкі на правядзенне 1 траўня Маршаў салідарнасці ўжо пададзены ў Магілёве і Гомелі. На Маршах салідарнасці будуць вылучаны патрабаванні спынення рэпрэсій і вызвалення затрыманых, скасавання дэкрэту аб дармаедах, выбар новага эканамічнага курсу і справядлівыя выбары.

“Правядзенне Марша па традыцыйным маршруце, які некаторыя называюць кампрамісным, дазволіць легальна сабраць людзей”, – кажа намеснік старшыні БКДП Сяргей Антусевіч:

– Фармат акцыі – гэта шэсце і сам мітынг. Натуральна мы разлічваем сабраць людзей каля Акадэміі навук а 16-й гадзіне. Гэта другі дзень выходных, фактычна панядзелак, але мы цудоўна разумеем, што частка людзей з’язджае з горада і каб яна магла ў гэтай другой палове дня вярнуцца і далучыцца да нашай акцыі.

У аргкамітэт па правядзенні Маршу салідарнасці акрамя Беларускага кангрэсу дэмакратычных прафсаюзаў уваходзяць актывісты іншых прафсаюзаў, левых партый, а таксама прадстаўнікі правацэнтрысцкай кааліцыі.

Павел Генадзіч, Беларускае Радыё Рацыя

Фота ucpb.org

Чытай больш на: http://www.racyja.com/palityka/apazitsyya-rykhtue-marshy-salidarnastsi-p/

19.04.2017

праваабарончыя сайты