Навіны

„Пад зоркай Максіма Багдановіча”

У Гародні прайшло культурніцкае мерапрыемства „Пад зоркай Максіма Багдановіча”.

У актавай залі інстытута біяхіміі Нацыянальнай акадэміі навук сабраліся аматары паэзіі, а таксама навучэнцы „Універсітэта Залатога Веку”, якія на працягу года слухалі курс дацэнта Алы Петрушкевіч „Літаратурная Гарадзеншчына ў постацях і лёсах”.  

Прагучалі дзве новыя песьні на словы Багдановіча ў выкананні Вольгі Калмаковай:

– Гэтыя вершы, на мой погляд. зусім розныя і па свайму зместу, і па эмацыянальнай афарбоўцы. Першы верш называецца “Цемень”. Я думаю, што гэта філасофскі роздум над чалавечым жыццём, якое для Максіма Багдановіча сапраўды бліснула яркай маланкай і хутка абарвалася.  

Сёлетнія ўгодкі смерці выбітнага паэта сталі штуршком да напісання новых песень. Але яшчэ больш гэты юбілей паўплываў на стварэнне вершаў прысвечаных Багдановічу, кажа гарадзенскі паэт Анатоль Брусевіч:

– Для мяне Максім Багдановіч – гэта самы першы паэт, паколькі з гэтым паэтам звязана перш за ўсё гарадзенская літаратура. Таксама Данута Бічэль-Загенатва, якая стварыла Музей Максіма Багдановіча, у які ў канцы 80-х пачатку 90-х хадзілі школьнікі, і я ў тым ліку. З музея вырасла ўся сучасная гарадзенская літаратура, таму для мяне імя Максіма Багдановіча вельмі важнае, вельмі знакавае, яго постаць больш чым асоба –гэта своеасаблівы сімвал.

На вечарыне верш „Зорка Венера” прагучаў на дзевяці мовах з вуснаў навучэнцаў „Універсітэта Залатога Веку”.

Выступіў хор „Узвышша”, а таксама прафесар Аляксей Пяткевіч, які распавёў пра Багдановіча.

Беларускае Радыё Рацыя, Гародня

Чытай больш на: http://www.racyja.com/kultura/pad-zorkaj-maksima-bagdanovicha/

20.04.2017

праваабарончыя сайты