Навіны

Прадпрымальнік: У гэтым супрацьстаянні пераможцаў не будзе

Індывідуальныя прадпрымальнікі гарадзенскага рэчавага рынку „Паўднёвага” чакаюць змяншэння на 14% арэнднай платы за гандлёвыя месцы.

На думку кіраўніка рады ІП гэтага рынку Андрэя Шасцярыкова, адміністрацыя і ўлады вучацца дамаўляцца з прадпрымальнікамі, але канчатковае рашэнне засталося за Міністэрствам юстыцыі.

– На маю думку, істотна гэта не дапаможа прадпрымальнікам. Таму што тут трэба глядзець у корань. Калі сітуацыя ў краіне толькі пагаршаецца, перадусім у эканоміцы. Мы бачым, якая пакупніцкая здольнасць у нашых пакупнікоў, а мы ад іх напрамую залежым. Тут трэба каардынальна ўсё мяняць. Трэба зніжаць арэндную плату. Я не гавару аб 14%. Я гавару ад 30-40%. Усё гэта трэба прадумваць. У гэтым змаганні, у гэтым супрацьстаянні пераможцаў не будзе. Будуць толькі тыя, хто прайграў, – як з боку ўлады, так і з боку прадпрымальнікаў.

Паказальна, што аўторак – гэта дзень аптовых закупак, калі традыцыйна бывае шмат пакупнікоў. Але цяпер такога не відаць. Значная частка рабочых месцаў – боксаў – зачыненая, а пакупнікоў зусім мала.

– Такі факт: моладзь бяжыць. Менавіта малодшае пакаленне. Тыя, якія працавалі побач са мной, з’ехалі ў Амэрыку. З’язджаюць сем’ямі. Такая сітуацыя – вельмі засмучае. І хоць па статыстыцы ў нас малы адток насельніцтва з рэспублікі. Але знізу бачна лепш. Людзі з’язджаюць. І досыць шмат хто ўжо пакінуў краіну. Хто ў Польшчу, хто ў Літву, хто ў Амерыку. Бягуць людзі. Эканамічная сітуацыя вельмі цяжкая.

На працягу мінулага года дагаварныя стасункі з адміністрацыяй рэчавага рынку „Паўднёвага” разарвалі 136 прадпрымальнікаў. Аднак ІПэшнікі рынку праяўляюць салідарнасць. На патрэбы аб’яднання „Перспектыва” толькі прадпрымальнікі рынку „Паўднёвы” сабралі 700 рублёў ахвяраванняў.

Якуб Сушчынскі, Беларускае Радыё Рацыя

Чытай больш на: https://www.racyja.com/ekanomika/pradprymalnik-u-getym-supratsstayan/

08.08.2017

праваабарончыя сайты