Навіны

Пра Льва Сапегу, канал Агінскага і сінагогу ў Слоніме

На традыцыйнай пераднавагодняй прэсканферэнцыі для мясцовых СМІ старшыня Слонімскага райвыканкама Алег Таргонскі сказаў, што ў 2018 годзе пытанне наконт помніка слонімскаму старосце, гетману Вялікага Княства Літоўскага Льву Сапегу ў Слоніме будзе вырашана станоўча. І помнік у наступным годзе ў Слоніме будзе пастаўлены.

Старшыня Слонімскага райвыканкама адзначыў, што цяпер вырашаецца пытанне і наконт аднаўлення слонімскай сінагогі – самага старога помніка Слоніма, які быў пабудаваны ў 1642 годзе. Па словах Алега Таргонскага, цяпер вядуцца перамовы з яўрэямі Ізраіля і Англіі. Калі ўсё будзе добра, то пачнуцца рэстаўрацыйныя работы. А ў будучым у слонімскай сінагозе запланавана адкрыць музей яўрэйскай культуры.

Алег Таргонскі адзначыў і тое, што сёлета пачалося ўпарадкаванне Малога канала Агінскага ў Слоніме. У наступным годзе на гэта будзе выдаткавана 60 тысяч беларускіх рублёў з мясцовага бюджэту.

Беларускае Радыё Рацыя, Слонім

Чытай больш на: https://www.racyja.com/hramadstva/pra-lva-sapegu-kanal-aginskaga-i-sina/

28.12.2017

Архіў

Відэа

праваабарончыя сайты