Навіны

Генадзь Фядыніч: Калі арганізацыя патрэбна людзям – яе знішчыць так проста не ўдасца

Старшыня прафсаюза РЭП Генадзь Фядыніч. Фота ПЦ "Вясна"

З 2 жніўня 2017 года, калі была ўзбуджаная крымінальная справа ў дачыненні да лідэраў прафсаюза РЭП, па 1 траўня 2018 года, у незалежны прафсаюз уступіла больш чым 620 новых сябраў.  Пра гэта праваабаронцам распавёў старшыня арганізацыі Генадзь Фядыніч.

“Больш 10-ці месяцаў Следчы камітэт працуе над расследваннем справы, намагаючыся падарваць давер да прафсаюза і аказваючы ціск на шэраговых сябраў прафсаюза: толькі праз допыты следчых прайшло больш за 550 чалавек. Безумоўна, улады чакалі, што людзі пасля такога прэсінгу будуць выходзіць з прафсаюза. Але, як паказала практыка, на сённяшні час ёсць толькі дзве заявы аб выхадзе з арганізацыі. А з іншага боку, з 2 жніўня 2017 года, па 1 траўня 2018 года у прафсаюз уступіла больш чым 620 новых сябраў.  У нас не было раней такога прыкладу масавага ўступлення ў прафсаюз. Калі арганізацыя патрэбна людзям – яе знішчыць так проста не ўдасца. Пакуль мы патрэбныя – будзем працаваць”, – кажа Генадзь Фядыніч.

Старшыня праваабарончага цэнтра "Вясна" Алесь Бяляцкі, каментуючы сайту praca-by.infoхуткую перадачу «Справы прафсаюзаў» ў суд, адзначае, што ўлады зрабілі вялікую памылку, якая не палепшыць імідж беларускіх уладаў на міжнароднай арэне.

“Я спадзяваўся, што будзе прынята палітычнае рашэнне аб спыненні «Справы прафсаюзаў», якое з'яўляецца палітычным. Але, на жаль, механізм, запушчаны ў жніўні мінулага года, выходзіць на фінішную прамую, у чэрвені, відавочна, адбудзецца суд. Паколькі справа палітычная, то і рашэнне суда будзе не аб'ектыўным, заснаваным на канкрэтных фактах, а палітычным. Мы сутыкнуліся з палітычным пераследам у чыстым выглядзе, у нашым выпадку - актывістаў прафсаюза, лідэраў прафсаюза РЭП, аднаго з найбольш актыўных і бескампрамісных незалежных прафсаюзаў у Беларусі. Нягледзячы на ​​адносны палітычны штыль, які ўсталяваўся ў Беларусі, улады паслядоўна працягваюць пераследваць актывістаў грамадзянскай супольнасці, у дадзеным выпадку - прафсаюзных лідэраў”, – заяўляе праваабаронца.

Нагадваем, 8 траўня лідэрам Беларускага прафсаюза РЭП Генадзю Фядынічу і Ігару Комліку прад'яўленае канчатковае абвінавачанне ва ўхіленні ад выплаты падаткаў у асабліва буйным памеры (частка 2 артыкула 243 Крымінальнага кодэкса РБ). 

 

http://spring96.org/be/news/89872

11.05.2018

Відэа

праваабарончыя сайты