Навіны

Суд пакараў журналіста Паўла Мажэйку вялікім штрафам (фота)

У судзе Ленінскага раена г. Гродна адбылося судовае паседжанне на якім была разгледжана справа вядомага незалежнага журналіста, былога палітвязня Паўла Мажэйкі. Нагадаем, што днямі Павал Мажэйка атрымаў копію міліцэйскага пратаколу ў якім яго абвінавачвалі ў парушэнні ч. 4. арт. 35 і ч. 15 арт. 1 Закону Рэспублікі Беларусь “Аб сродках масавай інфармацыі”. Міліцэйскі пратакол сведчыць, што “Мажэйка П.І. 25 сакавіка 2018 г., знаходзячыся ў Каложскім парку г. Гродна, падчас правядзення масавага мерапрыемства, прысвечанага 100-годдзю БНР, не маючы акрэдытацыі журналіста замежнага сродку масавай інфармацыі, браў інтэрвію ў прамым этэры на сайце польскага тэлеканалу “Белсат”, прысутнага на мерапрыемстве Саранчукова В.В. і змясціў на сайце польскага спадарожнікавага тэлебачання Белсат з мэтай далейшага распаўсюджання, чым парушыў патрабаванні нормаў арт. 22.9 КаП РБ”.

Судовае паседжанне вёў суддзя Дзмітры Бубенчык, якому спатрэбілася 40 хвілін для разгляду справы, пасля быў абвешчаны нядоўгі перапынак  і агалошана пастанова суда. У адпаведнасці з якой, незалежны журналіст Павал Мажэйка быў прызнаны вінаватым у здзяйсненні адміністрацыйнага правапарушэння, прадугледжанага арт  22.9 КаП РБ і пакараны штрафам 35 базавым велічынь, што складае 857 рублеў 50 капеек.

Аргументы Паўла Мажэйкі, які спрабаваў давесці да суда тое, што ен не здзейсняў падчас урачыстых мерапрыемстваў, прысвечаных 100-годдзю БНР, адміністрацыйных правапарушэнняў, судом прыняты не былі. Падставай для вынесення абвінавачвання былі сведчанні  міліцыянтаў. Адпаведна Павал Мажэйка сваю віну не прызнаў, і каментуючы сітуацыю адзначыў:

– Ніякія довады па палітычных справах у нас ні на што не уплываюць, ні кім не ўспрымаюцца. Памер штрафу залежыць выключна ад настрою суддзі, альбо ад тэлефанавання “зверху”.

17.05.2018

праваабарончыя сайты