Гарадзенская вясна

Дзяржаўная раённая "Лідская газета" апусцілася на ровень шавіністычнай расейскай бульварнай прэсы. Гэтае выданне рэгулярна змяшчае артыкулы, перадрукаваныя з розных чарнасоценных сайтаў, у якіх абражаюцца беларускія грамадскія актывісты, мова тытульнай нацыі, беларускія нацянальныя ініцыятывы.

Чарговай такой бруднай публікацыяй стаў артыкул за подпісам Антона Быстрыцкага. Публікацыя "Интерес в этом деле скорее личный" абражае нацыянальныя пачуцці беларусаў, змяшчае абразы ў бок носьбітаў беларускай мовы. У гэтай сітуацыі лідскія сябры Партыі БНФ Валер Мінец і Сяргей Пантус звярнуліся ў Лідскі РАУС, раённую пракуратуру і Міністэрства інфармацыі Рэспублікі Беларусь з мэтай недапушчальнасці такіх дзеянняў з боку рэдакцыі раённай газеты.

Адказу на афіцыйныя пісьмовыя звароты пакуль няма.

Намесніца галоўнага рэдактара газеты Людміла Петрулевіч паведаміла журналістам, што галоўная рэдактарка Кацярына Серафіновіч, якая адказная за публікацыю, зараз у адпачынку, да 19 ліпеня. Гэты Быстрыцкі (пакуль цяжка сказаць, ці гэта рэальнае імя) нібыта перыядычна прыходзіць у рэдакцыю і прыносіць матэрыялы галоўнаму рэдактару.

Пасквіль "Интерес в этом деле скорее личный"  пачаткова быў надрукаваны пад іншым загалоўкам на адным з расейскіх шавіністычных сайтаў, які зарэгістраваны ў Пецярбургу.

Начальнік аддзелу ідэалагічнай працы, культуры і па справах моладзі Лідскага райвыканкаму Ірына Рабец каментаваць адыёзную публікацыю ў газеце адмовілася.

Ці будзе прыцягнута да адказнасці рэдакцыя "Лідскай газеты" паводле закону - пакажа бліжэйшы час.