Навіны

У 2020-м пачнецца будаўніцтва бальніцы ў Альшанцы

Бальніца ў мікрараёне Альшанка, якая знаходзіцца на паўднёвым захадзе Гародні, будзе будавацца ад 2020-га года. Пра гэтыя планы сказаў падчас прыёму з грамадзянамі старшыня гарвыканкама Мячыслаў Гой. Некаторыя тэмы, асабліва транспартныя, у Альшанцы не вырашаныя, і людзі не маюць беспасярэдняга злучэння з важнымі аб’ектамі гарадской інфраструктуры. Кажа Мікалай Салянік – старшыня абласной структуры АГП у Гародні.

– Няма транспарту, якім напрамую можна было б даехаць да абласной бальніцы, бальніцы хуткай дапамогі. Жыве ўжо 30 тысяч, а будзе 70 тысяч насельніцтва. І дабрацца да такіх устаноў, як бальніцы, вельмі важна.

Сябры аб’яднанай грамадзянскай партыі, якія былі на прыёме, зацемілі, што актыўны дыялог грамадскіх актывістаў і ўладаў рэч неабходная. Але, на жаль, ініцыятыву да такіх сустрэчаў праяўляюць, як правіла, грамадскія актывісты, а не ўлады. Сустрэча адбылася па прычыне таго, што Аляксандр Лаўрэнцьеў, актывіст АГП, прапанаваў Аляксандру Лукашэнку пад час візіту ў Гародню наведаць мікрараён Фабрычны, які мяжуе ў Альшанкай. Кажа Мікалай Салянік:

– Як павінен быў прыехаць да нас у Гародню прэзідэнт, ён павінен быў бы наведаць мікрараён Фабрычны і паглядзець, як у ХХІ стагоддзі людзі выходзяць на вуліцу, каб справіць свае патрэбы. Няхай бы паглядзеў, як выглядаюць там дамы, як іх уцяпляюць і як там людзі жывуць.

На думку Мікалая Саляніка, паляпшэнне інфраструктуры, пасадка зялёных зонаў, будаўніцтва школы застаецца на кантролі гарадзенскіх уладаў. Але грамадскія актывісты, сярод якіх і Мікалай Салянік, гатовыя дапамагчы людзям рознымі акцыямі, у тым ліку шляхам напісання зваротаў і збору подпісаў.

Якуб Сушчынскі, Беларускае Радыё Рацыя, Гародня

Чытай больш на: https://www.racyja.com/hramadstva/u-2020-m-pachnetstsa-budaunitstva-balnitsy-u-a/

26.10.2018
Крыніца: Беларускае Радыё Рацыя

Відэа

праваабарончыя сайты