Навіны

"Астравецкая праўда" піярыць будучага праўладнага "дэпутата"

Раённая газета "Астравецкая праўда" актыўна піярыць вылучэнца ад улады ў кандыдаты ў дэпутаты па Смаргонскай выбарчай акрузе №59 Віктара Свілу (поўнае імя - Виктор Збигневич Свилло). Віктар Свіла - намеснік старшыні Астравецкага райвыканкаму, вызначыўся за апошнія гады актыўнай прапагандай пабудовы Астравецкай атамнай станцыі, забяспечваў ідэалагічнае абгрунтаванне гэтага будаўніцтва.

Віктар Свіла раней працаваў у камсамоле, потым на Ашмянскай рэгіянальнай мытні, апошнія 14 гадоў, хоць жыве ў Ашмянах, ездзіць на працу ў Астравец.

Ініцыятыўная група патэнцыйнага кандыдата ў дэпутаты Віктара Свілы была зарэгістравана 13 верасня. Але пра тое, што ён будзе вылучацца ў дэпутаты Палаты прадстаўнікоў, можна было здагадацца яшчэ раней.

Папярэдні "дэпутат" ад гэтай акругі Адам Кавалько, былы старшыня Астравецкага райвыканкаму, замешаны ў шматлікіх карупцыйных скандалах, апошнім часам дзяржаўныя органы вялі праверку яго дзейнасці. У час папярэдняй парламенцкай кампаніі Віктар Свіла быў даверанай асобай Адама Кавалько. Праўдападобна, гэтага, скампраметаваўшага сябе чыноўніка, больш не будуць прызначаць на высокія пасады.

Незадоўга да рэгістрацыі ініцыятыўнай групы Віктара Свілы, 6 верасня, у раённай газеце "Астравецкая праўда" з'явілася вялікае інтэрв'ю з Віктарам Свілам пад загалоўкам "Виктор Свилло, знакомый и неизвестный". Што цікава, гутарка з Віктарам Свілам зроблена па-беларуску, а загаловак па-расейску. Інтэрв'ю выканала Ніна Рыбік, былая галоўная рэдактарка "Астравецкай праўды", раней сумнавядомая тым, што адмаўлялася друкаваць у газеце артыкулы незалежных кандыдатаў у дэпутаты, у прыватнасці Мікалая Уласевіча.

Такая публікацыя інтэрв'ю ў дзяржаўнай газеце адназначна павінна трактавацца, як выкарыстанне адміністрацыйнага рэсурсу праўладным прэтэндэнтам у кандыдаты ў дэпутаты, які займае высокую чыноўніцкую пасаду.

 

Архіў

Відэа

праваабарончыя сайты