Навіны

За забойства пенсіянераў пад Слуцкам пракурор запрасіў расстрэл для аднаго з фігурантаў

Віктар Скрундзік і Валянцін Бушнін. Фота: Сяргей Балай, TUT.BY

Віктар Скрундзік і Валянцін Бушнін. Фота: Сяргей Балай, TUT.BY

Дзяржабвінаваўца запрасіў пакаранне для фігурантаў справы аб забойстве двух пенсіянераў і замаху на жыццё трэцяй пад Слуцкам, піша TUT.BY. Двух пажылых мужчын жорстка забілі і спалілі жыўцом. Абвінавачаныя мянялі паказанні падчас працэсу, ні адзін не прызнаў сябе вінаватым цалкам. Пракурор просіць прызначыць аднаму фігуранту смяротнае пакаранне, астатнім - працяглыя тэрміны пазбаўлення волі - 18 і 22 гады.

14 студзеня 2019 года ў вёсцы Сухоўчыцы быў забіты 79-гадовы Міхаіл Шугалей. Абвінавачванні прад'яўленыя 29-гадоваму Віктару Скрундзіку і 33-гадоваму Валянціну Бушніну.

Бушніна абвінавачваюць у падбухторванні да забойства, гэта значыць забіваў старога, як паказана ў абвінавачванні, Скрундзік, але Бушнін сказаў яму гэта зрабіць («дзеда трэба прыбіраць») і не спыніў Віктара, калі той душыў пенсіянера і падпальваў яго дом. Валянцін Бушнін заявіў, што вінаватым сябе ў забойстве не прызнае, настойвае, што ўсё зрабіў Скрундзік.

Праз тыдзень, 21 студзеня 2019 года, адбыўся наступны напад – на 94-гадовага Уладзіміра Гаркавога, ён жыў у вёсцы Ульянаўка. Мужчыну душылі провадам, рамянём і таксама спалілі яшчэ жывым. З яго дома зламыснікі вынеслі 280 рублёў і некалькі бутэлек алкаголю.

Абвінавачванні прад'яўленыя Віктару Скрундзіку і 25-гадоваму Віталю Мяцежу. Мяцеж віну ў забойстве не прызнае, кажа, што злачынства здзейсніў Скрундзік. У судзе Віталь заявіў, што прыяцель яго агаворвае і што падчас следства, калі Мяцеж прызнаваў віну, ён сам сябе агаварыў.

Праз дзесяць дзён, 31 студзеня 2019 года, у вёсцы Сухоўчыцы адбыўся чарговы напад – на 85-гадовую Соф'ю Мацеле. Віктар Скрундзік, якому прад'яўлена абвінавачанне ў замаху на забойства, збіў жанчыну, пагражаў яе забіць і вымагаў грошы. Пенсіянерцы атрымалася выратавацца, таварыш Скрундзіка раптам зайшоў у дом і спыніў яго.

Дзяржабвінаваўца Вадзім Лолуа у спрэчках падкрэсліў, што як часта бывае пры здзяйсненні асабліва цяжкіх злачынстваў, абвінавачаныя знаходзіліся ў стане алкагольнага ап'янення – па ўсіх эпізодах. Як заяўлялі самі фігуранты, жаданне здабыць грошы на выпіўку было адзіным матывам нападаў. Скрундзік і Бушнін раней ужо былі судзімыя – за крадзяжы, з трох абвінавачаных афіцыйна працаваў толькі Віталь Мяцеж, але як і яго таварышы, быў заўважаны ў злоўжыванні алкаголем. І ў Мяцежа, і ў Бушніна - на выхаванні маленькія дзеці.

На думку пракурора, віна фігурантаў даказаная. Дзяржабвінаваўца просіць асудзіць Віктара Скрундзіка да выключнай меры пакарання – смяротнай кары, Віталя Мяцежа – да 22 гадоў у калоніі, Валянціна Бушніна – да 18 гадоў зняволення.

Адвакат Скрундзіка лічыць, што пакаранне ў выглядзе расстрэлу занадта суровае. На яго думку, мэты крымінальнага пакарання могуць быць дасягнутыя максімальным тэрмінам пазбаўлення волі, гэта значыць пажыццёвым зняволеннем.

 

https://dp.spring96.org/be/news/96089

Відэа

праваабарончыя сайты