Навіны

Юрыю Панасюку "за абразу прэзідэнта" прысудзілі 2 гады абмежавання волі

23 снежня суд Ленінскага раёну Гародні на закрытым паседжанні абвесціў прыгавор гарадзенцу Юрыю Панасюку - паводле артыкулу 368 Крыміналнага кодэксу яму прысудзілі два гады абмежавання волі без накіравання ў выпраўленчую ўстанову. Гэта так званая "хатняя хімія".

Панасюка звінавацілі ў тым, што з 2 па 26 ліпеня 2020 года ён на сваёй старонцы ВКонтакте, якая знаходзіцца ў вольным доступе для іншых карыстальнікаў сеткі, «размясціў выявы, якія змяшчаюць негатыўную ацэнку Прэзідэнта Рэспублікі Беларусь Лукашэнкі А. Г., якая мае ненарматыўную форму маўленчага выказвання, чым публічна абразіў Прэзідэнта Рэспублікі Беларусь».

Панасюка не бралі пад варту, ён быў цэлы час волі. Яго дапытвалі ў Следчым камітэце і Галоўным упраўленні па барацьбе з арганізаванай злачыннасцю і карупцыяй. Юрый сцвярджаў, што яго ў кастрычніку прызналі абмежавана разумным на псіхіятрычнай экспертызе ў лячэбным прыватным унітарным прадпрыемстве "Рэзервовыя магчымасці чалавека" ў Менску. Са студзеня 2020 года яго прызналі інвалідам трэцяй групы пасля агляду ў Гродзенскім абласным клінічным цэнтры "Псіхіятрыя-наркалогія".

Крымінальнай справы Юрыя Панасюка магло не быць увогуле. Фармальна ён парушыў заканадаўства, але органы, якія чамусьці вельмі выбарча і мэтна палітычна вядуць маніторынг сацсетак, маглі абмежавацца папярэджаннем. Асабліва ўлічваючы тое, што Панасюк выдаліў свой допіс і тое, што ён мае пэўныя праблемы са здароўем. Што датычыць прыгавору суда, то ён выглядае зажорсткім - калі браць пад увагу ўсе акалічнасці, суд мог бы вызначыць мінімальнае пакаранне, прыкладам, невялікі штраф.

 

Архіў

Іншыя навіны

Відэа

праваабарончыя сайты